Por Laza pasa a Vía da Prata, chamada así na Idade Moderna porque por este camiño viña ata Compostela a prata das Américas, que desembarcaba no sur de España. Sen embargo, parece que o seu trazado orixinal responde a unha antiga Vía Romana que viña de Mérida a Astorga. Segundo Elixio Ribas, na súa obra “Camiño Meridional de Santiago”, este Camiño tamén foi chamado Verea Real, porque dende o renacemento suple á vía romana e segue sendo a ruta oficial do correo, do estado, etc...Tamén foi chamada Brea dos gañáns, debido a que por ela pasaban moitos maragatos que viñan dende Astorga para vender as súas mercadorías, algúns deles quedaron a vivir en Laza. Temos que sinalar que unha das figuras do Entroido deste pobo, hoxe desaparecida, era o maragato, en clara alusión a esta xente que aquí deixou a súa pegada. Outro nome que recibiu foi o de Verea dos Galegos, por ser a ruta dos segadores que ían a Castela.
Actualmente, no seu albergue acolle cantidade de peregrinos, que veñen dende lugares de toda España, Europa e do resto do mundo. Este albergue ten unha capacidade para acoller a 30 persoas, e conta coas seguintes dependencias: cociña, habitacións, sala de estar, baños, duchas, secadeiro da roupa, etc...
Se a afluencia de peregrinos é moi grande poden aloxarse no Pavillón de Deportes tamén, xa que este conta con 25 duchas.
No ano 2006 o Albergue de Peregrinos de Laza acolleu a 1.778 peregrinos, sendo os meses de maior afluencia na primavera e no verán. Aínda que a maioría dos peregrinos son españois, hai un número importante de persoas que viñeron do resto de Europa: Alemaña, Francia, Bélxica, Noruega, Inglaterra, Suíza, Luxemburgo,Austria etc.... Tamén, neste ano, viñeron vinte e un peregrinos de Canadá, tres do Xapón, oito de Estados Unidos, doce do Brasil, catorce de Australia, tres de Arxentina, un de Uruguai e outro de México. |
